氹仔服務好 高級葡國餐

香港中西文化匯聚，各地菜式都有得食。但葡國菜真係比較少，所以接近每次去到澳門，都會食一餐葡國菜。今次午餐只食左一碗麵，夜晚可以留多少少budget，食更高級、適合打卡，服務又好嘅餐廳。最後發現一間新餐廳，呢度保留左香港已經買少見少，部分工序，會由職員喺客人面前烹調欣賞。而呢度嘅水，唔係普通過濾水，而係來自葡國Caramulo金馬輪礦泉水，更添異國風味。

餐巾

烘脆麵包配特製牛油

本身麵包好乾，有少少麥香。西餐廳嘅牛油如果唔係獨立包裝，大廚應該有另外炮製。原來大廚用蒜泥、歐芹為牛油調味，整到牛油唔太鹹又有少少奶香之餘，多左好多香味，增加麵包本身嘅層次。

橄欖

有水浸過，橄欖有變軟，但仍然食得出青橄欖比較爽脆、黑水欖軟滑，鹹味有洗走少少，但加入蒜香味，今次第一次去葡國餐廳食得曬佢地。

開胃完，就可以睇餐牌叫嘢啦！

等緊食物嘅過程，欣賞下裝修

上樓上洗手間，見到上面裝修都好靚

炙燒葡式香腸 $138

葡國臘腸係一樣常見食材，基本上好多菜色都會有。但直接食佢當主角，都係第一次。

伏特加燒腸，燒走部份油脂，而火焰都可以增加打卡效果。

燒好之後，店員會將葡國臘腸切成一片片，方便食用。臘腸燒過，變得乾身，令臘腸更加脆口，酒精增添香味之餘，都有減少鹹度。

整個噴火過程

https://youtu.be/Iz1qQ1s4R-o?si=EKwEFL0kA285I9eG

炙烤八爪魚及黑毛豬串燒配波特酒醬 $109

八爪魚先慢煮再用醬汁燒，令八爪魚保持軟糯。中間伊比利亞黑毛豬都有煎過，配搭烤脆麵包。最上層有波特酒醬同歐芹，帶出少少味道。

葡式焗鴨飯 $248

最面層有葡國臘腸臘肉，中間係飯。

咁鴨呢？挖開飯面，就見到鴨肉絲放底部。鴨肉比較淡，為左增加鹹味香味，除左臘腸之外，餐廳特意加入埋葡國臘肉。飯面烘得乾身好脆，肉類嘅油份都滲入飯裡面，令成個飯好香。

葡式風味辣醬烤雞配手工脆皮地瓜條及沙律 半隻$190

雖然都係燒雞，但同非洲雞好大分別。呢個燒雞無椰漿香料，只有葡式辣醬Piri-Piri，無椰漿香料，舖頭入面嘅焗爐有風乾功能，可以鎖水，所以食起上來皮脆肉嫩，唔會鞋。就咁食，味道好足夠，唔需要再點辣椒醬。辣椒醬本身有蒜頭同橄欖油香味，再點雞會變得過辣，不過我地之後發現要來點地瓜條幾適合。地瓜條，就咁食係好重蕃薯甜味。雖然薄薄一層粉，加上應該炸漿裡面有啤酒，有氣泡嘅脆感，但味道感覺太健康，點少少辣醬，感覺即刻邪惡返。

火焰橙酒班戟 $228

店員先落牛油、特製醬汁（有楓樹糖漿、橙汁、檸檬汁、君度酒），再加橙皮提香。

放上班戟後，再放君度酒蒸發酒精，保留酒香帶出火焰效果。

西式甜品偏甜，呢個係店內少數有調整口味嘅菜式，甜度減少，配合亞裔人士口味，但同時葡國人都會覺得正嘅味道。牛油香嘅班戟淋上醬汁，慢慢食到酸甜、酒香、橙皮嘅微苦，如果班戟疊埋切，就會有埋蛋香，同埋感覺更加鬆軟。

製作過程，侍應姐姐處理食物，有戴好口罩，保持衛生，呢樣繼續有保持到

https://youtu.be/A80vVkxohO4?si=TgMuix4f0BB6Q_qL

葡式水果酒 Sangira (紅酒) $79

微微煮過嘅紅酒，散走大部分嘅酒精，只保留酒香。用青紅蘋果同橙，浸住紅酒，再增加果香，適合解膩。

葡式氣泡特調 Cooler (青蘋果)$70

青蘋果下面嘅綠色部分，飲得出有少少微粒，證明真係果汁，而唔係合成糖漿，配上梳打水，酸甜清新，一樣開胃。

小計 $1062

總數 $1168

#葡富軒

氹仔舊城區客商街31號地舖

電話: 28883308