高質甜品新小店

話說九份茶舍執左之後，變成一間台式甜品店，見到好多朋友推介，有啲款式適合打卡，令我今晚好想試下。

睇下餐牌先

招牌薄脆窩夫 $46

配抹茶雪糕🍵、士多啤梨🍓、朱古力醬🍫

見到個樣都係西式嘅擺法，以為好膩，好厚果款。好彩佢粉漿好輕，整到一塊薄脆嘅窩夫，仲要用心切開幾份，適合用同屋企人分享。靚女推介抹茶雪糕同朱古力脆脆雪糕，都比較多人揀。不過咁多料，清新啲好，所以揀抹茶，抹茶同朱古力醬好夾，加埋酸嘅士多啤梨，味道好平衡。

攞返屋企係咁嘅，唔會浸濕窩夫

一重雙皮奶凍$18 +香蕉🍌$5+紅豆$5=$28

我唔識分雙皮奶凍，同普通奶凍嘅分別。不過呢個奶凍係好滑嘅，紅豆份量多，所以可以一啖紅豆，一啖奶凍。而香蕉配奶凍，感覺比較新鮮，你地下次試下

窩心罐裝糖水系列

紫米露(左) $38

本身對啲用罐仔裝嘅糖水，無咩期望，可以打卡就好。不過原來佢椰汁味道都好濃，紫米好足料，所以糖水嘅質感都係偏濃稠嘅。飲滑嘅糖水，都有啲嘢咬下，感覺超好。

椰汁紅豆椰果 (右) $32

都係濃稠嘅椰汁，配紅豆同椰果，完勝茶記紅豆冰。

總計：$144

窩心小街

葵芳葵富路7號葵涌廣場潮流廊二期2樓2015號舖

無電話

高質外賣有Fusion

深水埗都好多嘢食，但多數都係黃金附近，或者文青街嘅Cafe，呢邊就比較少去嘅。準備返屋企，就可以試下呢間一人外賣店啦！收錢同廚房都係腦細，等緊果陣可以溝通下，同埋睇到成個製作過程，好好睇。

睇下餐牌先

台式牛肉·沙茶醬意粉🍝 $68

台式本身都係食飯，改為配意粉呢種Fusion食法。今次用左台式沙茶醬炒意粉，中式嘅味道。鹵牛展用左十二小時慢煮，鹵水配沙茶，香口得來好有台灣特色，面頭再加啲油蔥酥，更加香口，今次揀得好好。

煙肉·芝士·肉鬆 蛋餅 $34

一個經典嘅邪惡組合，本身芝士有拉絲嘅蛋餅已經好正，加埋煙肉嘅油香，已經可以係一個幾豐富嘅早餐。加埋好重手嘅肉鬆，望落好豐富。#古早味 粉漿加蛋令餅更香滑。點嘅醬汁唔係茄汁同沙律醬，今次有韓式辣醬同醬油膏。韓式辣醬都有少少甜辣嘅效果，不過比台灣嘅辣。醬油膏質感濃厚，又鹹又甜嘅感覺好奇妙，你地揀下點咩汁

總數：$102

#造咖

深水埗大埔道75號威信大廈地下2號舖

電話: 91752930