茶記特色海南雞

有一次體現茶餐廳#中西合璧 有香港特色啦！今日去到荔枝角長沙灣交界，工廠區一間茶記，見幾多人幫襯，餐牌選擇幾多，就入去試下。今次有試嘅嘢，都好有特色。

睇下餐牌先

呢度環境幾好

西蘭花忌廉湯

叫完嘢，好快就有湯上。如果你去一間海南雞專門店，或者泰國餐廳，你會得到一碗冬瓜雞湯。不過侍應哥哥話舖頭唔做中湯，只有西湯，就有呢個效果啦！個湯好濃，好多西蘭花，都有少少蒜蓉味，感覺唔錯。免費送嘅湯計，係非常OK

L4 海南雞大碗飯 $48

一般大碗飯都係日式嘅餸，或者放燒臘。海南雞飯一般都係一隻碟放雞，再有一個細碗裝油飯，今次變成大碗飯真係過癮啦！今次油飯同雞真係鋪滿一個碗，另外有花生同幾條甘筍，分量好足夠。油飯雖然無咩顏色，不過都有香茅同蒜蓉香味，味道其實好足夠。雞皮爽，有浸冰水，雞肉都算滑。推薦點辣醬多過薑蓉，酸酸辣辣有蒜蓉味道。如果要講嘅，只係雞有骨，望落唔太似海南雞飯。

凍檸茶 $＋3

個樣就係普通凍檸差一杯，所以都無影低啦！除左酸甜之外，吞落去好似有黑糖嘅感覺，有蔗嘅味道，同埋茶有少少麥茶味，變成「特飲」

總價:$51

#金葉

九龍長沙灣長沙灣道909號地下1號舖

極少素肉，高質Fine Dining

最近#素食青年 好多Post，開始認識呢個名，原來呢間Vegan Fine Dining做到14/8，好多特別嘅肉食名稱西餐，但呢度極少用#素肉，主要用蔬菜造成，但個整體感覺都好似食肉，非常高質。不過因為臨近結業，好多想食嘅款式都無，比較失望。

先睇餐牌

Foie Gras Pate with Toasts $128

真鵝肝太膩，我食唔到，今次嘅代替品都係Creamy，但感覺清新少少，有烤果仁嘅味道，今次嘅鵝肝就係腰果啦！之後有黑松露同油浸風乾番茄🍅兩種味道，夾喺多士上面，同下面嘅意大利黑醋火箭菜，感覺清新好多。

Seared Watermelon Steak $128

個樣擺到好似半熟吞拿魚，其實係西瓜🍉燒過令西瓜由清甜，變成濃郁嘅甜味。口感唔再係清爽，反而有椰果同魔芋混合嘅感覺，真係好特別。

Fish & Chips $178

炸魚係香蕉花蕾，平時本身用來煲湯，宜家變成炸，已經洗走曬啲苦澀味。點他他醬，或者類似喼汁嘅酸甜醬，更有肉感。薯條就係普通香脆🍟無咩嘢講。有個薄荷豌豆蓉要講下，青豆蓉好綿滑，加埋薄荷味，就可以去左陣豆腥味。

Vegan African Chicken $208

非洲雞用左新鮮羊蹄菇Hedgehog Mushroom，開頭以為係猴頭菇，但完全無苦味，原來今次食到咁特別嘅菇。同黃薑、花生等香料好夾，不過唔明點解非洲雞會浸住咁多椰漿。

Signature Plant Based Meat Ball Spaghetti $168

意粉感覺同平時一般嘅好唔同，感覺煙韌啲，應該唔係乾意粉，係手工鮮意粉。不過因為其他嘢太驚艷，肉丸好似比下去，都係類似Impossible嘅牛肉丸，熟悉嘅味道。

Lychee Projict (J) $158

個名好特別，其實係荔枝糖漿＋罐頭荔枝，配紅茶加少少奇亞子，味道好又解渴。

Service Charge $96.8

Grand Amount:$1064.8

POP vegan

中環蘇豪伊利近街28號1樓

電話: 26286211

#素食 #無五辛 #全素 #黃店

#無得飛喺香港食住先