喺維港海景旁邊，圍爐打邊爐，絕對係精緻火鍋嘅極致享受！新鮮食材即煮即食，湯底香濃滋味。
配住璀璨夜景，浪漫又暖心。同朋友小酌，將潮汕牛肉部位快快輕刷，都能放鬆身心，喺香港呢個地方，用最溫暖舒服嘅方式，品味潮汕精緻嘅淡雅，值得一試！
揀下湯底先
呢碟涼拌椰菜，翠綠爽脆，浸住紅油辣椒同蒜蓉酸醋，酸辣交織開胃，啖落脆脆多汁，係呢餐火鍋嘅好開始。
養生野菌湯 $32
呢個湯底雖然顏色深似滷水，味道一樣濃厚，但因為無油膩感，菇香濃郁又自然，令整體口感清爽又健康。煮菜煮菇都好夠味，味道配搭得好平衡。
百香果酸湯 (微辣) $36
呢個酸湯望落似雲南傣族變奏，但其實呢個係全港首創以新鮮百香果調製嘅酸湯，有半隻百香果，真材實料。湯底融入輕辣元素，酸甜微辣、清新解膩。發覺本身有味嘅肉類放落呢個湯底，可以解膩，清淡嘅蔬菜同菇，就放去隔離野菌湯底，配搭夠聰明～
蔬菜盛合 $88
蔬菜盤好新鮮豐富！玻璃生菜脆口，娃娃菜嫩滑，金菇同蟹味菇爽脆，心裡美蘿蔔少見又甜～配火鍋超養生！最愛放落香濃野菌湯，濃而不膩，吸湯一流。
手切潮汕五花趾 (例) $188
五花趾真係牛肉火鍋嘅明星！位於牛後腿內側，筋脈豐富，脂肪少肉味濃郁。煮落野菌湯底吸晒菇香，嫩滑彈牙又唔膩。呢塊肉配呢個清爽但濃郁嘅湯底，記得建議時間8秒～
即炸響鈴卷金黃酥脆，層層疊疊好誘人！放落湯底淥幾秒，太耐就會浪費即炸嘅用心。咬落香脆無油膩味，好鬆化，配酸湯嘅果香絕配～我一吸到湯味即刻攞走直接食，咁食法最能享受即炸嘅鮮脆同湯底香味，超正！
台山桶蠔 （4隻）$128
呢個台山桶蠔好飽滿，肉質滑嫩水潤，表面光澤晶瑩，帶住新鮮嘅海味香氣，啖啖都彈牙多汁，酸湯比較清，唔會搶味。
粒粒墨魚腐皮卷 $58
粒粒墨魚腐皮卷好惹味！腐皮脆香配墨魚爽滑，雖然就咁食已經好正，但無專屬醬汁始終有啲遺憾。
潮汕粿條 $28*2=56
潮州粿條，比一般廣東河粉滑好多，主要用純米製造，雖然容易夾散，但特別容易吸湯汁。放落濃郁嘅野菌湯底，襯返呢種滑嘅粿條，完全吸收晒鮮味，食落更香濃又有口感。之後忍唔住，加單叫多碟。
淮山 $32
爽脆鮮淮山放野菌湯底超match！淮山本來清甜，煮落吸晒菇香，保持脆口又夠味，配埋呢個湯底嘅濃郁菇味，食落健康又解饞。
頂級手切潮汕雪花牛頸脊（例）$238
雪花肉非常珍貴，通常一頭牛最多只能產出700克左右，因為牛隻運動頻繁，位於牛肩背脊前端嘅肌肉，細膩又油潤。肥脂咬落爆香，肉味濃郁平衡。官方建議淥8-12秒最適合，但熄火用百香果湯餘溫輕煮，微微粉紅色口感更嫩滑，味道清新又特別，試咗之後更鍾意！
潮汕粿肉 (8粒) $38
潮州粿肉，原來類似福建嘅雞捲，大馬嘅滷肉。用腐皮包住豬肉餡，經過半煎炸之後，外脆內嫩，配合肥豬肉，鮮香嘅汁水四溢。呢度嘅餡料好似有少少鮮淮山，增加少少爽口，口感香滑又帶肉香，就咁食有五香粉嘅香口，已經好正。配上特製嘅檸檬醬，酸甜惹味又解膩，原來潮州特色小食，都可以咁精緻。超級開胃又有飽肚感，值得一試！
手打檸檬茶酸酸甜甜，加上黃皮嘅微苦香氣同果香，如果只飲到黃皮肉，更加只有果香，完全唔苦。成杯飲品清潤透心，清新解渴，好有層次感，打完邊爐潤返曬，食完兩碟牛，落格啦！
手打苦瓜檸檬茶 少甜、少冰 $32
第一啖帶少少苦澀，緊接香水檸檬嘅酸味，層層襯托苦瓜嘅清新，醒胃又健康，苦中帶清爽，味道夠特別。打完邊爐，清熱啱曬。
小計 $1016
加一 $101.6
總額 $1118
圍爐
香港天后電氣道68號樹林銀座23樓
電話: 68038170
