試試日式新小店

上次去橫跨深水埗同太子嘅基隆街，其實大南街都係咁，不過呢邊近年比較多Cafe，想食飽都有新選擇。近太子呢邊食，最近開左一間日式小店，有各種炸物同壽喜燒，不過因為太新，新到門口有張紙貼住試業，所以人流未算太多。

睇下舖頭環境都好和風

呢度係用QR Code落單嘅(好彩有WiFi)，所以自己上網睇啦，Cap第一版先，拉落去仲有少少選擇。

每個客人會有一碟酸醃蘿蔔作為餐前小食，一般中式嘅會有啲臭味，不過因為呢間加左啲柚子，所以得返清新開胃嘅感覺。

名古屋風味粟米(素)$58

驟眼睇，有一種好熟悉嘅感覺，有啲似大排檔嘅避風塘粟米。呢個炸粟米都有炸蒜同少少辛辣味，呢種味道唔係來自辣椒，而係來自七味粉同生蔥，香口得來唔會太刺激。

胡麻赤麵(冷)$48

就咁睇，佢唔太特別，就係一般蕎麥麵。就係芝麻醬加啲青瓜同蟹柳撈埋。但佢地嘅麵條比出面爽，幾樣嘢撈埋有清爽嘅感覺，適合食兩樣炸嘢。

吉列千層豚$78

腦細話呢個比較厚，要炸耐啲，以為係普通嘅厚豬扒。原來係一個#手工菜 ，用好多塊腩肉薄片疊埋，再上粉炸，會比普通豬扒多啲肉汁，多一份油香。當食超過一件之後，開始覺得膩，就記得點醬啦！原來佢唔係普通嘅沙律醬，佢溝左少少Wasabi，除左酸酸甜甜，都有一份輕微嘅刺激感，配搭相當有心思。

100%橙汁$16

真係唔太甜，開胃舒服

總計 $200

八不

大南街52號地鋪

電話:64111154