去到粉嶺，唔想食連鎖店，都係要行遠少少。去到聯和墟，咁多條街，其中一間茶記，麵檔，點都會有嘢啱食。今次試呢間又係茶記，又有日式同泰式嘅餐廳，因為日式同泰式都有，真係好少見。
串燒黑毛豬甲拋飯 定食 $85
價錢望落有啲貴，不過也可以揀味噌湯或者冬陰功，B同C類各揀一款小食
味噌湯
一樣有裙帶菜，但出品比一般香港日式餐廳淡。唔會太鹹，我反而鍾意。
蟹籽沙律
碗仔細細，不過應該有嘅青瓜、蟹籽、蟹柳都會齊，仲有足夠嘅日式蛋黃醬。
鹽酥雞
炸得香脆乾身，跟住我用來同沙律一齊食
串燒黑毛豬甲拋飯
即係香葉肉碎飯，其實我唔識分肉碎係咪真係用甲拋葉(台灣叫打拋)炒，一般香港嘅餐廳都係用金不換嘅。呢度嘅肉碎炒得香辣，加埋有蛋汁嘅脆邊煎蛋🍳好好送飯。好彩呢度嘅飯量都好足夠，佈滿成個湯碗嘅底部，唔會好似平時得一個酒樓飯碗咁多。濃味嘅食物，的確可以食多啲飯。黑毛豬可以留返最後先食，兩串黑毛豬好厚肉，燒得好Juicy，加埋泰國辣粉，有置身泰國嘅感覺。
燒豬頸肉拼盤 $65
豬頸肉唔係煎，真係燒，所以出品比較耐。豬頸肉好厚身，外面好脆，裡面多汁，未點醬汁之前，有少少甜味。點完個酸甜汁，就會解膩。除左豬頸肉之外，仲有豬牛雞串燒各一串。每串個醃料都有少少分別。
牛肉串(2pcs) $28
牛肉少得好香口，肉好軟，不過其中一串多啲肥膏。
熱檸茶
龍眼冰(少冰)$22
龍眼好多，雖然香甜，但感覺似係龍眼本身焗嘅味道，無咩糖，所以抵飲。
總計：$200
滿屋定食
粉嶺聯和墟和泰街33號地舖
電話: 28193088
