唔係老字號，做到老味道

傳統嘅冰室，係飲嘢、食冰、食蛋糕……無飯食嘅，要食飯，食炒嘢，係要去#茶餐廳 ，咁有飯食嘅冰室，行茶餐廳之實嘅，肯定係近年新開。呢啲需要，特登去試下去咩質素啦！

睇下餐牌先

鐵板黑椒牛柳絲炒麵 $78

門口話自己鐵板專家，應該係講緊鐵板扒，不過今日唔係太想食扒，所以試下呢個。鐵板一上，好多醬汁炸炸聲，仲有好多煙，非常夠熱。不過麵無完全俾黑椒汁浸腍，大部分都仲係脆嘅。牛肉、青紅椒同洋蔥份量好多，食完麵，都有少少牛肉剩。呢度用嘅係傳統茶記黑椒汁，黑椒落得相當重手，好辣但開胃，所以食完需要飲多啲水。

酥炸香脆大雞髀$38

睇佢又唔算大得誇張，不過賣相幾好，外皮炸得乾身。正當我擔心乾身成咁，裡面都會柴嘅時候，用刀切出好多肉汁。咬落去，呢啲紅色嘅肉汁唔係血水，而係南乳，又係一個傳統嘅茶記特色。

凍檸茶🍋 ＋$3

叫左少甜，茶味同檸檬一樣配合，但唔會太澀。有下次

總計 $119

#力天冰室

新蒲崗◀◁◀今次食嘅係分店

崇齡街81-83號崇齡大廈地舖

電話: 26626822

===↓↓===呢間先係總店====↓↓===

何文田

窩打老道73號地下D號舖

電話: 96923989

醉美新店來襲，開啟全新夜生活

🌟✨   Sidekick Bar嘗鮮時刻！有一班靚女朋友，話銅鑼灣耀華街，啱啱有間Sidekick Bar新開張，話要帶我開啟全新夜生活！ ✨🌟

呢度有獨具特色嘅雞尾酒 同小吃，新張期內，仲有超值八折優惠！俾佢地講完之後，緊係唔會淨係叫啤酒咁寡啦！即刻叫左每兩款雞尾酒，等Bar Tender，展現佢地獨特嘅藝術。

🌙等緊嘅同時，望下呢度嘅環境。 呢度係香港夜生活的靈魂。因為環境高私密度，講咩都得。仲可以同朋友歡聚和愛人甜蜜、合作夥伴私密交流。呢種無憂暢談嘅感覺，即刻唔想再落老蘭。

🎉 新店新氣象，Bar Tender哥哥，溝左呢兩款特色雞尾酒俾我地試，要我地品鑒下！

🍹Long Island iced tea $78

裡面有Gin,Rum,Vodka,Tequila,Triple Sec,Lemon,Coke，用左咁多烈酒，感覺好易醉，不過因為按小比例，所以唔啃喉，加埋可樂嘅氣，同檸檬嘅清新，反而做到爽口絲滑。

Shooter $138/6shots

Young-Soju-Passion Fruit

燒酒本身太難入口啦！Bar Tender將燒酒加左熱情果汁，一種清新果香，令燒酒年輕化，可以喺酒吧飲。

Sidekick Bar

銅鑼灣耀華街38號The Zing!8樓

電話: 95592259

大圍村屋小餐廳

大圍食嘢，宜家好多人都去商場，最近圍方開左，更多人去。所以我試下除左火車站附近幾條街，仲有咩食。搵到村屋都有一間西餐食，仲有各種牛扒賣。

今次老闆比較得閒，所以我就無睇餐牌，直接問佢推薦食物，自己再揀飲品啦！

舖頭環境

芝士泡菜豚肉定食 (包沙律、餐湯、白飯)$98

沙律

各種沙律菜都有，唔係好肥嘅沙律醬，係類似凱撒沙律嘅醋，感覺開胃。

粟米薯仔湯

薯仔通常配番茄，佢呢個配粟米，有少少Cream。薯仔唔係大塊切，都唔係完全薯蓉，有少少沙沙口感，不過已經感覺好Creamy。

芝士泡菜豚肉

本身我唔太食泡菜，因為唔鍾意佢濃烈嘅味道。不過呢度泡菜用左韓國空運嘅新鮮泡菜，無防腐劑，再用芝士煮過，雖然一樣有蒜味，但即刻易入口左好多，酸酸甜甜好開胃。豬肉片都唔肥，好好送飯，好快食曬碗飯。

藍莓沙冰 $42(跟餐半價=$21)

開頭見到個價錢，覺得有啲貴，會想睇下佢係咩情況。跟住見到原來成座山咁高，飲慢少少，真係會瀉架，所以其實下面個盤唔係裝飾。好啦！睇完樣，飲落去，好綿滑，完全無碎冰，仲要真係有幾粒藍莓點綴下，突然就覺得幾抵。

總數$119

DR. COW 牛扒專家

大圍下徑口村31號地下A號舖

電話: 70727998

#foodie #foodiesofinstagram #hkfoodie #hkfoodlover #food  #pasta #dessert #cafe #steak #smoothie

#牛扒 #甜品 #意粉 #美食 #小店  #食好西 #相機食先 

搬新店後一路爆場，宜家試下期間限定款

一生懸麵 嘅出品一直都維持日本特色，雖然比一般拉麵店少啲款式。但#沾麵 可以揀#冷麵、熱麵，維持正宗之餘，配合各人需要，抵佢由旺角開始，到荃灣、九龍灣。再到荃灣宜家搬埋去地舖，應該會吸引更多人，因為真係見到7點開始已經爆場，想入去食，係一定要攞飛，然後坐喺門口排隊。

睇下餐牌有咩食

舖頭環境

睇完就用QR code落單啦！

蜆貝羊肚菌拉麵$113 (+$18叉燒)

宜家每間分店，都有唔同嘅#期間限定 口味。試完呢款，可以去另外兩間分店，試埋另外兩款。先飲湯，主要係海水鹹味，但唔會好鹹好腥，撈埋羊肚菌醬，湯底好清好夠味，仲會有多種鮮味。蜆有四隻，都算幾多。因為加左$18，所以我碗麵有兩款叉燒，一款係腩肉，肥瘦相間，入口即融，加埋用火槍燒過，有少少焦香，都可以令一個好清嘅湯底，加返少少油脂。另外一款叉燒好瘦，無脂肪，有胡椒香味。唔知呢個都係期間限定嘅叉燒，定係慢煮叉燒浸耐左呢。下次要試多次，先決定到啦！

野菜山拉麵(粗麵)$78

佢呢碗嘅粗麵，用左沾麵嘅麵。呢碗麵主要用豬骨湯底，本身都有啲油脂，加埋大量椰菜同芽菜，少少蒜蓉同胡椒，係有少少#二郎系列 拉麵嘅感覺，不過無太多背脂，所以食一碗要啲時間，但未至於非常辛苦。

煎餃子$29

雖然都大概知道係來貨，但佢地嘅餃子皮薄餡靚，豬肉椰菜都有，煎得金黃香口。加少少麵粉水，造成羽根效果，會更加香脆吸引。

Sage 蘋果桂花烏龍有氣茶 $22

食拉麵多數飲日本汽水，不過難得呢度有一個少見嘅香港品牌，又有氣，試下無妨。呢個品牌，都會用日本同台灣靚茶葉。呢個就係蘋果汁、桂花糖同烏龍茶，雖然有氣，但飲落清甜舒服，成份夠乾淨。

一生懸麵

荃灣(◀◁◀今次幫襯呢間)

荃灣富榮街7號富裕樓地下7號舖

====↓↓↓仲有以下分店↓↓↓=================

九龍灣

九龍灣牛頭角道3號得寶商場地下121號舖

電話: 37058766

旺角

旺角通菜街73號地舖

電話: 27481001

深水埗人氣上海美食

又落深水埗食嘢，都係黃金附近嘅福榮街，附近都有好多麵食嘅選擇。雲吞麵 、車仔麵 ，呢啲超常見，不過呢間夾喺幾間文記中間，都咁多人排，證明佢都有佢嘅賣點。

未入去，見到特價麵食、各種江南點心，入到去睇詳細餐牌，仲有好多唔同款式嘅小菜，豐儉由人。

黃金蝦球 $128

呢碟份量幾大，麵皮好薄，掛到好多鹹蛋黃，香而不會太油膩，蝦肉夠大夠彈牙。不過呢個必須趁熱食，食完其他嘢，攤凍左少少，效果即刻差好遠。

蟹粉小籠包 5隻 $118

雖然$118呢個價錢，好多地方都做到，不過人地係4隻，呢度有5隻。就算有，出面肯定唔會咁豪，用蟹粉做記認嘅。裡面好多湯，蟹粉多過豬肉。如果要彈，最多係塊皮厚少少。

霸王辣子雞 $138

傳統嘅辣子雞，都係將啲雞切得好碎，然後配好多辣椒。不過咁樣就會令碟餸好多碎骨，所以好多舖頭已經變成雞丁，更少成本。呢度一樣係切到碎，配合辣椒Size，但無碎骨，同埋食到雞嘅唔同部分，唔係雞翼雞髀。雞粒炸得乾身，係好香口。呢個第一啖食，會覺得幾辣，之後愈來愈無問題。

雲腿津白 $88

睇個樣係最清嘅一樣，津白有用上湯煮過，唔會太淡，再打一個芡，令佢入口更滑，呢度嘅五大塊火腿切得好厚，令佢賣相好好。

總數: $472

上海萬家村小館

深水埗福榮街117號地舖

電話: 36145562

工廈高質泰國菜

約左朋友食飯，佢話想食特色泰國菜，我喺下晝食果陣覺得啲船麵唔錯，但未試過散叫，所以睇完餐牌之後，夜晚就去金亞淶試下啲打卡泰國菜。呢度雖然係工廠區，但交通方便，鄰近地鐵，呢度其實就係之前程班長個位。

睇下餐牌有咩食先

睇完就用QR Code落單啦！因為工廠大廈網絡唔係好好，所以呢度有裝WiFi

可以睇下環境

泰式春卷 4件 $58

呢度嘅春卷好多料，除左豬肉之外，都有木耳、紅蘿蔔等等，外面皮脆，但無咩油，食落真係好開胃。

#菠蘿海鮮炒飯 $88

飯炒得乾身，粒粒分明，飯除左黃薑之外，都有少少香辣嘅咖哩味。材料有好多，肉鬆下面有蝦球、魷魚、雞肉，同味道好似豬肉乾嘅泰國臘腸，缺點係菠蘿殼太細，好容易倒瀉飯。

#泰式火山骨 $168

好多舖頭都有呢個菜式，但第一次有舖頭係大到夾唔起嘅。唔好話筷子，就算用手套攞，都放唔到落碗，真係超適合打卡。都真係食，撥走上面嘅芫茜，見到裡面係泰式酸甜汁，點豬肉食好正。睇賣相係煲湯肉，但又無一般煲湯肉咁鞋，點汁配合排骨本身近骨嘅油花位，成件事會變得好正。

#青檸梳打$20

青檸同泰國梳打水，無咩添加，但食左咁多嘢，好適合解膩。

金鑽鮮菠蘿冰🍍$20

外觀見到杯嘢有啲黃色，原來係菠蘿果醬🍍果肉好甜，整到出名夠甜嘅金鑽鳳梨，都可以少少酸。所以好飲過平時罐頭菠蘿🍍落罐頭水嘅好多，呢個比較真材實料。呢個甜度好足夠，又有解膩效果。

#椰皇三重奏$42

普通版有椰皇燉奶、椰皇水啫哩，今次加埋好嫩滑嘅椰肉，配合自己炒嘅椰絲，變成四重奏。

椰皇燉奶燉得好滑，都有椰香味，外面已經好正，下層更期待

椰皇水啫哩望落似大菜糕嘅質感，但無佢咁硬，少少爽口

下一層係椰肉，平時好多椰皇嘅肉都係硬到食唔到，椰青肉先夠嫩。呢間舖頭特登訂啲靚椰皇，所以好夠嫩，嫩到全部肉都可以清曬。

總數：$396

#金亞淶泰國餐廳

荔枝角長沙灣道883號億利工業中心1樓102號舖

電話: 28893478