高質牛肉沾麵，好快無啦

話說有一晚喺尖沙咀上堂，想睇下有咩舖頭食得，喺 香港人的飲食購物天地 發現呢間做到11月16日結業，本身鍾意拉麵，又見到佢哋嘅款式特別，一定要幫襯。下晝食得有啲飽，所以淨係叫一碗好多人鍾意嘅麵就算啦!

慢煮黑松露安格斯牛沾麵 $188

豬骨湯底，再加好多菇味，少少黑松露香味，湯底濃而不膩，亦唔會好似一般沾麵湯底咁鹹，未加水飲幾啖都接受到。湯底除左椰菜，裡面仲有帆立貝一隻，感覺更高質。

麵可以揀冷暖，雪凍過浸返湯，就唔會過腍。所以今次揀左冷麵，呢個都係正宗嘅食法。

舖頭仲有少少文宣，邊食邊感覺好心噏，咁黃又高質，又會捐錢嘅黃店，最終捱唔住啦！

牛肉方面🐮因為經過慢煮，所以就算脂肪唔多，都可以保持嫩滑，外層都有燒過，加埋燒汁，帶出油香。肉顏色有啲紅，感覺有啲生，如果太熟，肉汁無曬就無曬慢煮嘅意義啦！如果好怕嘅，試下浸湯食，可以令牛肉熟少少，同埋吸收到菇嘅香味，都唔差。

有朋友問老闆，會唔會遲啲再開返？佢話唔會啦！後悔太遲認識到呢間嘢💔我一定會再嚟食多次㗎(起碼好多人鍾意嘅餃子都未試)，一定會！😭食完之後，繼續見到好多人排緊隊。

#鶴亀

尖沙咀漢口道19-21號漢宜大廈地下L號舖

電話: 51158979

 

#hkfoodie #foodporn #foodie #foodiesofinstagram 

#拉麵 #沾麵

#用港幣懲罰佢  #用脂肪懲罰我 #黃店 #良心食店 #尖沙咀

#食好西