米線名店有驚喜

大角咀最近開左一間米線店，原來係紅磡米線名店嘅分店，開足十年，仲推出十週年新品，門口宣傳超吸引，果然有料到，經過即刻入座幫襯。

睇下餐牌有咩食先

元祖金酸濃湯米線 $35
魚肉春卷 +$12、魚皮餃+$10、娃娃菜+$9=66
呢個十週年新品超吸引，豬骨高湯配黃椒醬同酸菜打成幼滑湯底，碗底少少碎酸菜加層次，完美還原酸菜魚嘅微辣酸鮮味。呢度可以選擇正宗嘅魚片，不過我需要變奏，所以選擇以下嘅配料：魚皮餃彈牙多汁有肉香、魚肉春捲脆嫩有軟滑，代替魚片一流；娃娃菜吸滿湯汁，軟嫩解膩。米線Q彈，碗底碎菜加嚼勁，整體均衡。

貴緣雞絲火山 $29
小食真心搶眼，雞絲刨得超幼細，入口即化但保留層次口感。雞絲本身清淡無調味，灑上辣粉帶香辣，再撈入榨菜片加鹹脆，瞬間變夠味，堆成火山造型又靚又過癮。

IF-香嫩椰青水$12
店內只提供樽裝飲品，因為怕辣放棄一般嘅可樂豆漿，改飲椰子水。藍色包裝IF-椰青水比綠色版多咗花香，甜度清新唔膩口，完美配濃郁金湯，飲落更爽。

總數：$107

#貴緣小鍋米線
大角咀◀◁◀今次幫襯呢間分店
櫻桃街38號西九匯2樓205號舖
電話: 56860520

====↓↓↓====仲有以下分店=======↓↓↓==
北角
和富道21-53號和富B樓B15-16號舖
電話: 66991872

石門C出口掃街清流救星

石門京瑞廣場本身係美食聖地，不過「由治及興」之後，想食嘅舖頭少左好多。一期cafe太少坐低選擇；想去二期掃街，麻辣涼皮一統江湖，令人惋惜。不過原來依家唔需要再入商場，只要一出C出口，就發現清流。最近新開嘅地舖「堂小二」，專攻港式雞蛋仔、腸粉、格仔餅，保留正宗掃街滋味，絕對係避開祖國口味嘅救星，姐姐仲好親切添！

去到睇下餐牌先

椒鹽炸燒賣5粒  $13

燒賣5大粒超夠份量，今次放棄蒸再落豉油辣油，選擇椒鹽炸香希望測試質素。金黃脆皮外脆內軟係港式新經典，鹹香撲鼻一流！不過椒鹽真係重手，食一粒就爆鹹，拎返屋企配飯沖淡係神來之筆，完美延續堂小二港味！

鹽酥雞 $26

鹽酥雞份量多到爆，外脆內軟多汁一流，啖啖咬落去都係滿口肉香，唔會乾柴完全過關！

手撕雞腸粉 $29

手撕雞腸粉愈來愈流行，堂小二版醬汁有胡麻、麻辣同冬蔭公選擇。糾結醬汁嘅時候，姐姐話佢自己怕辣都食到，所以我就放心試伏啦！原來冬蔭公係東南亞香料主導加青檸酸甜，唔辣仲清新！ 青瓜爽脆清新，花生脆口添香，腸粉滑溜配手撕雞嫩滑，撈汁完美平衡。

金莎格仔餅 $30

傳統鬆厚格仔餅配花生醬煉奶砂糖係經典，呢度都有！但我決定加錢，選擇堂小二創作嘅金莎味（朱古力榛子醬+脆花生粒）玩轉創意，夠晒香港靈活創新！餅底外脆內厚實，配搭濃郁香滑嘅榛子醬，加埋花生粒加脆度超match。

總數：98

堂小二

沙田石門安群街3號京瑞廣場1期地下G01A號舖

手撕雞新口味 唔伏

今日經過一間手撕雞店，見店名「呂錦記」好特別，同醬料名牌超似，忍不住買返屋企加餸！

入去發現口味爆豐富，除傳統麻油辣味，仲有孜然、藤椒等創新款，注重健康嘅朋友，試去皮調味都啱晒！

除左手撕雞，仲有各種小食、套餐

呂錦記孜然手撕雞 $60半隻
色澤金黃油亮，雞絲整齊撕開嫩滑多汁，賣相超吸引！均勻裹孜然粉末香料，開頭擔心多調味會過鹹，點知呂錦記自家控味一流，完全無過鹹問題。反而有串燒煙燻微辣香氣，入口香氣沖天又順口，新口味絕唔伏！份量望落少但無舖雞骨，食到夠飽，值得再幫襯！
⭐⭐⭐⭐⭐

貢菜 $18
手撕雞必加爽脆蔬菜！貢菜麻辣香脆順口，完美襯托雞肉嫩滑多汁，咬口彈性入味足，份量飽足CP值爆燈，下次外賣必點！
⭐⭐⭐⭐⭐

呂錦記手撕雞專門店 (西環)

西營盤皇后大道西263號地舖

電話: 97132723

「劣食之塔」有清泉

今晚俾朋友約去傳說中嘅「劣食之塔」——兆萬中心食嘢，一開始真係有少少驚。不過上到去，發現呢間火鍋店裝修好正常，光線明亮、枱凳企理，蔬菜、肉丸，甚至飲品同醬料款式都幾齊全，第一眼感覺應該唔係傳說中咁劣質。

晚市時段入座，每人$229。

開到3點仲有得食

睇餐牌，可以揀先上雞煲，再加湯打邊爐，或者直接由湯底開始。每人加$50「成本價」可以要海鮮船，另外再加$50就可以任食刺身或者靚少少嘅牛肉。

雞煲上枱前，刺身同海鮮船到先，方便打卡。開動刺身，魚生幾鮮甜。

蝦仲識郁

今次因為雞煲份量大，每人直接加咗三次$50升級（一次刺身、一次海鮮船、再一次靚牛），普通任食加埋升級，總數三百幾蚊鬆啲，已經食到飽，無需要再掂平肉，直接衝水果甜品收尾，CP值爆燈。牛肉呢個加錢絕對建議，雪花紋路靚，賣相一流 。

今次揀咗個「鴛鴦麻辣雞」雞煲，份量超大，特色係喺平時麻辣雞煲基礎上加多田雞。辣度BB辣，醬味足夠，蒜頭八角打底，面層芫茜辣椒點綴，味道幾平衡。

上枱後要等八分鐘先食得，呢段時間出去攞飲品調醬。

飲品好貼心，雪凍同室溫都有

醬料方面常見嘅麻油、金銀蒜蓉、蔥花之外，同特別嘅XO醬、柚子醋同花椒米醋都有。

最特別係店家用胡麻醬特別調製嘅「皇后醬」同「皇帝醬」，前者帶辣，後者帶少少酸，幾啱鍾意自行調味嘅人。

蔬菜同火鍋料

生果

返位揭蓋，醬汁收晒乾，雞件有先拉過油，特別入味，田雞無炸保持嫩滑，但醬味淡少少，整體麻辣夠喉。

按一般套路，食完雞煲應該就加湯打邊爐，呢度可以選擇直接加滾水。不過為咗唔怠慢之後上枱嘅海鮮船，決定用平時喺任食火鍋先用嘅「無水蔬菜湯」食法：趁職員未到之前，先鋪一層娃娃菜同芽菜喺鍋底，主要係用嚟出水，再慢慢煮出第一層清甜。之後加第二層食材補甜味，包括絲瓜、粟米同番茄。雖然一般會用大番茄片，但呢度蔬果區冇，所以改用車厘茄代替，加熱到皮開始甩就夾走，只保留酸甜蕃茄肉喺湯入面。

再之後就到水果登場，先落砂糖桔出水，再加百香果肉同汁，湯底即刻變成有少少似酸湯牛肉嗰種果酸辣感。當蔬果湯差唔多成形，再喺面層鋪多圈娃娃菜，將魚片同元貝放喺菜葉上面用蒸汽慢慢蒸熟；而鮑魚、大蜆、蟶子同蝦，就直接擺喺娃娃菜下面，用已經好有層次嘅蔬果湯煮熟，海鮮味同果酸、蔬菜甜味互相交疊，成個火鍋由麻辣雞煲過渡到清爽酸甜海鮮鍋。

比較麻煩係蠔，因為連殼上枱，水位其實唔算夠，單靠蔬菜自己出水未必浸得住。最後落咗一罐啤酒入鍋，一方面提高水位令蠔可以完全浸入湯入面，另一方面煮滾之後酒精揮發，只留下少少麥香，同酸甜蔬菜湯幾夾。等到海鮮食得七七八八，再按需要叫職員幫手加少少水，俾對方都有啲「工作」，同時又唔會一次過稀釋晒之前慢慢煮出嚟嘅味道。

海鮮掃晒，靚牛肉出場，用吸滿雞海鮮蔬果精華嘅湯底輕涮，牛脂香配果酸勁夾，比上湯少鹹膩。

碟牛真係靚爆，封門柳手切最重牛味，安格斯小排油潤有嚼勁，極上牛板腱厚實霸氣，嚴選牛肩胛穩陣，SRF和牛肉眼樣樣優點齊！

牛肉盤點
手切封門柳：純牛味濃郁，適合輕涮保持鮮香。
安格斯牛小排：油花均勻，入口即化解膩一流。
極上牛板腱：切最厚，牛筋軟嫩咬感豐富。嚴選牛肩胛：均衡萬能，任何湯底都hold得住。
SRF和牛肉眼：油脂香氣頂級，所以我最愛。

對比一下用QR CODE落單嘅金錢腱

升級後食到飽，甜品水果無限食。雪糕雪條應有盡有，生果唔止西瓜蜜瓜橙，每款都好想食。「劣食之塔」兆萬中心出現一個驚喜實驗場，特別呢個無水湯底，令成晚玩味十足，同傳統火鍋截然不同。下次再嚟，只加海鮮船同牛就夠，繼續玩！

壹火鍋
旺角西洋菜南街1N號兆萬中心16樓
電話: 27808399